મને યાદ છે.. તને યાદ છે?

મેઘલી શ્યામલ એક રાતે, આપણી પ્રથમ મુલાકાતે,
એક રસ્તાની બંને તરફ ભીંજતા એકબીજાને આપણે જડ્યા,
મને યાદ છે.. તને યાદ છે?

પછી પગલાંએ પંથ જરા ટૂંકો કર્યો,
પછી મોસમને ચાહવાનો ગુનો કર્યો.
પછી હૈયાની હોવાનાં અણસારે તું,
પછી શ્વાસોનાં અજવાળે ઓગળતો હું,
અવસરને અજવાળી જાતે, એકબીજાની લાગણીઓ ખાતે,
ભાન ભૂલીને ઓગળતા એકમેકમાં, એકબીજામાં ભૂલા પડ્યા.
મને યાદ છે.. તને યાદ છે?

પછી સપનાની કુંપળને સમજણ ફૂટી,
પછી જીવવાની જંખનાઓ સાથે લૂટી,
પછી સુખ દુખનાં સરવાળા સાથે જીત્યા,
પછી તારીખનાં પાનામાં વર્ષો વિત્યા,
જીવનની જૂદી શરૂઆતે, મસ્તીનાં મતવાલા નાતે,
સાવ અંગત બની ઝૂમતા-ચૂમતાં, સાવ અંગત બની ઝળહળ્યા.
મને યાદ છે.. તને યાદ છે?

હવે વાતાવરણ છોને વરસાદી છે,
હવે આંખો પણ એવી ક્યાં ઉન્માદી છે?
હવે ડૂમાનો તરજુમો, ડુસ્કાનું ઘર,
હવે તારા વગર મારું સૂનું નગર,
નાહક નજીવી કોઈ વાતે, અજાણ્યા કોઈ આઘાતે,
અધવચાળે મૂકી સાથ-સંગાથને એકબીજાથી છૂટા પડ્યા.
મને યાદ છે.. તને યાદ છે?

- અંકિત ત્રિવેદી

કદી તો તું અમી નજર મારા તરફ કરીશ.

તું મને પ્રેમ કરે કે ના કરે હું તો તને કરીશ,

તું મારી પર મરે કે ના મરે હું તો મરીશ.



ડર, સંકોચ કે ગભરાટ છે તારી માન્યતા,

હું તો ખુલ્લેઆમ પ્રેમનો એકરાર કરીશ.
 

-દિયું ત્રિવેદી


દિલને આમ દુભાવવાથી કઈ નહી મળે,

હું તને મનાવવાની સતત કોશિશ કરીશ.



હું ક્યાં કઈ માગું છુ તારી પાસેથી કદી ,

કદી તો તું અમી નજર મારા તરફ કરીશ.



જીવનભર સાથ નિભાવવાનું નથી કહેતો,

પણ મારું જીવન તો તને ન્યોછાવર કરીશ.



દયા દાનથી તારો પ્રેમ નથી જોઈતો મારે,

મારા પ્રેમમાં દમ હશે તો તું પણ મનેપ્રેમ કરીશ.......